防火门

全国免费热线: 400-0011-1164
导航菜单

防火门知识

看野眼 | 防火防盗防画画

《 防火防盗防画画 

                              ------沈一珠

宏村人民蛮友好,

就是胆子交关小,

防火防盗防画画,

造屋挖沟贴纸条。

前两天去了一埭宏村,有趣事体交关。真心觉着宏村人民朴实又友好,但是,好像胆子蛮小的。

宏村跟别地方勿一样,买门票进村,就会有导游免费跟侬走。一个团队,一对情侣,哪怕有辰光只有一个人单吊,只要侬有需要,导游从来勿嫌比。伊拉训练有素,关于宏村的点点滴滴,像背书一样从嘴巴里顺顺当当流出来,勿打一眼眼嗝楞,像从前阿拉女儿小辰光读书用的复读机。所以,像阿拉迭种勿跟团的人,勒一个地方多蹲几分钟,就可以碰着几批人,听几遍一式一样的内容:

比方讲,宏村顶著名的景观就是月沼。为啥叫月沼呢?因为就是一只小池塘,而且是长得像半只月亮的小池塘。据说当年宏村碰着祝融老爷光顾,对的,就是村里着火了。偏偏远处山哴的溪水救勿了近火,加上侪是老房子,呒么救了。

宏村老祖宗们痛定思痛,一发兴,勒村里挖了迭只形状像半只月亮呃池子,先捺远水引到小池塘里,又横七竖八挖仔交关水道,四通八达,水就引到宏村家家户户门口,可以喫可以用,听上去阿是有点像现在排自来水管子工程?据说有一个外国专家去宏村,看到搿能一只古老又实用的工程,呆脱。

再比方讲,宏村里有一个盐商,是当年顶发财的。有了钞票以后,伊捐了五品官,造了大房子,就是正宗徽派建筑了。男人长年勒外头做生意,又担心屋里的女人跟钞票,所以,就挖空心思造门,伊勒门哴设计了三道防线。导游讲,搿就是最早的防盗门。门实在太复杂,下趟寻机会专门写一趟。

宏村祖先们当年么想到过,防火的水防盗的门,现在变成了一道道美丽的风景线。捺末好,交关画图的人蜂拥而来。人忒多,也讨惹嫌,一群学生仔孵了人家门口,一杯饮料一只画架,一坐就是半天。人家进出勿便当,郈了,交关人就勒门口贴张纸条:私人住宅,请勿画画。

呵呵,防火防盗,又防画画,古人不明白今人的苦。

【沪语解释】

嫌比:嫌弃。

              嗝楞:停顿。